Blog

O pasado venres 6 de marzo tivo lugar nas instalacións da Asociación de Empresarios do Ceao e As Gándaras un encontro institucional co conselleiro de Emprego, Comercio e Emigración da Xunta de Galicia, José González Vázquez, nunha xornada que serviu para fortalecer o diálogo directo entre a administración autonómica e o tecido empresarial do polígono.

 

O encontro reuniu a empresarios e empresarias da contorna nun espazo de conversa aberta no que puideron trasladar de maneira directa as súas inquietudes, necesidades e propostas. A reunión desenvolveuse nun ambiente próximo e participativo que favoreceu o intercambio de impresións sobre cuestións clave como a formación para o emprego, a captación de talento e os retos actuais do mercado laboral.

O presidente da asociación, Francisco Dorado, exerceu de anfitrión da xornada e puxo en valor a importancia de impulsar espazos de encontro que permitan achegar as administracións públicas ao tecido empresarial e coñecer de primeira man a realidade das empresas que desenvolven a súa actividade nos polígonos industriais da cidade. Durante a visita, o conselleiro estivo acompañado polo delegado territorial da Xunta en Lugo, Javier Arias, e pola directora territorial da Consellería, Carmen José López.

Durante o encontro, o conselleiro destacou o modelo de formación para o emprego impulsado pola Xunta de Galicia, baseado na flexibilidade, na especialización e na adaptación ás necesidades reais das empresas. Neste sentido, explicou as principais liñas de actuación que se están a desenvolver no marco da renovación das políticas activas de emprego, orientadas a reforzar a conexión entre a formación e a inserción laboral.

Así mesmo, abordáronse diferentes iniciativas destinadas a favorecer a captación de talento e a mellorar a competitividade do tecido empresarial galego, así como programas específicos orientados a incentivar a contratación e a cualificación profesional das persoas traballadoras.

Desde a Asociación de Empresarios de O Ceao e As Gándaras valoramos moi positivamente a celebración deste tipo de encontros, que contribúen a fortalecer a colaboración institucional e a avanzar na definición de medidas que respondan ás necesidades reais das empresas do polígono e do conxunto do tecido empresarial de Lugo.