Blog

A Asociación de Empresarios de 'O Ceao As Gándaras' colabora coa Axencia Galega de Sangue, Órganos e Tecidos (ADOS) na difusión dunha nova campaña de doazón de sangue que terá lugar no Polígono do Ceao o próximo xoves 18 de xuño, en horario de 09:30 a 14:30 horas.

A unidade móbil de ADOS estará situada no aparcadoiro de Hierros Ferreiro (ao carón da áncora), co obxectivo de facilitar a participación das persoas traballadoras e das empresas da contorna nesta iniciativa solidaria.

A doazón de sangue resulta esencial para garantir a asistencia sanitaria nos hospitais galegos. Cada día son necesarias entre 400 e 500 doazóns para atender intervencións cirúrxicas, tratamentos oncolóxicos, transplantes, accidentes e outras situacións de urxencia. Ao tratarse dun recurso que non se pode fabricar, a colaboración cidadá é fundamental para asegurar a súa dispoñibilidade.

Poden doar sangue as persoas maiores de 18 anos, cun peso superior aos 50 quilos e que gocen dun estado de saúde normal. Antes da doazón, o persoal sanitario realizará unha breve revisión médica e todo o proceso levarase a cabo con material estéril e dun só uso.

Dende a Asociación de Empresarios de 'O Ceao As Gándaras' animamos ás empresas, traballadores e traballadoras do polígono a participar nesta campaña e contribuír cun xesto sinxelo que pode axudar a salvar vidas.

Para máis información, ADOS pon á disposición da cidadanía os teléfonos 900 100 828 e 881 546 900, así como a súa páxina web.